MWnews.am կայքը Mobile World Congress 2013-ին /Բարսելոնա-Իսպանիա/

28.02.2013

Նախաբան

Վերջին տարիներին MWC-ն դարձել է բջջային սարքավորումներ արտադրողների համար կարևոր իրադարձություն և մեծ հետաքրքրություն է ներկայացնում թե սովորական սպառողների, թե բջջային շուկայի ներկայացուցիչների, թե լրագրողների շրջանում: Mobile World Congress 2013 ցուցահանդեսին մասնակցել են ավելի քան 1 700 ընկերություններ, որոնք ներկայացրել են իրենց սարքավորումները և ծառայությունները 94 000 քառ. մետր մակերես ընդգրկող տարածքի վրա:

Mwnews.am-ի հատուկ թղթակից Տաթևիկ Ղազարյանը նույնպես ներկա է եղել այս համաշխարհային միջոցառմանը և ներկայացրել է MWC2013-ը իրադարձությունների վայրից: Ամենահիշարժան և հետաքրքրական փաստերի մասին դուք կարող եք իմանալ ստորև:

Samsung

MWC 2013 ցուցահանդեսի ժամանակ ազդարարվել է դյուրակիր պլանշետների նոր սերնդի մասին: Galaxy Note 8.0-ն աշխատում է Android 4.1.2 Jelly Bean օպերացիոն համակարգի և ֆիրմային TouchWiz համակցիչի օժանդակությամբ:

Պլանշետը շատ արագագործ է. աշխատում է առանց արգելակումների` ի շնորհիվ արդյունավետ և հզոր միջուկի, որը համանման է Galaxy Note 10.1-ում արդեն օգտագործված տարբերակին:

Կարելի է ստանալ ավելի կոմպակտ սարքավորում նույնանման գործառնական հնարավորություններով: Պլանշետը կշռում է ընդամենը 338 գրամ: Մոդելը վաճառքում կհայտնվի այս տարվա երկրորդ եռամսյակում, իսկ արժեքի մասին որևէ ինֆորմացիա դեռևս չկա:

Galaxy Note 8.0-ը, չափերով մոտ լինելով iPad Mini-ին, գրավեց իր տեղը 5,5” Galaxy Note II և 10” Galaxy Note 10.1 պլանշետների միջև, կրկին հաստատելով հարավ-կորեական ընկերության մտադրությունը` լուրջ հակահարված տալ “խնձորային” պլանշետներին և Nexus 7-ին:”2013 թվականը Samsung-ի համար պլանշետների տարի է”,- հայտարարեց ընկերության փոխնախագահ Նանդա Ռամաչանդրանը (Nanda Ramachandran) ցուցադրության ժամանակ: Նա խոստացավ այս տարի ներկայացնել պլանշետների նոր մոդելների ևս մի ամբողջ շարք:

Huawei

Ինչպես և ակնկալվում էր, Huawei ընկերությունը MWC 2013 ցուցահանդեսին ներկայացրեց P ոճային շարքի իր նոր սմարթֆոնը` Ascend P2-ը:

LG

Բջջային սարքավորումներ արտադրող խոշոր ընկերություններին համաքայլ LG-ն համարձակ կերպով ներխուժեց պլանշետաֆոնների աշխարհ և անցած շաբաթվա սկզբում պաշտոնապես ներկայացրեց իր նոր` LG Optimus G Pro անվանումը կրող, դրոշակակիրը:

LG Optimus G Pro

Նորույթը կարող է պարծենալ որակյալ 5,5 դյույմանոց IPS ցուցասարքով (1920×1080 թույլատրելիությամբ), որը զբաղեցնում է սարքավորման գրեթե ամբողջ առաջամասը:

Հատկանշական է, որ ցուցասարքը շրջանակող եզրակը շատ բարակ է. ձախից և աջից այն կազմում է ընդամենը 3 մմ:

Բացի տպավորիչ էկրանից, LG Optimus G Pro-ն հագեցած է նոր, 1,7 ԳՀց հաճախականություն ունեցող, քառամիջուկ Qualcomm Snapdragon 600 պրոցեսորով, 2 Գբ-անոց օպերատիվ և 32 Գբ-անոց ներկառույց ֆլեշ հիշողություններով` տվյալների պահպանման համար: LG ընկերության բոլոր սմարթֆոնների նման, Optimus G Pro-ում ևս բնիկ է հատկացված MicroSD ձևաչափի հիշողության քարտի համար:

Բացի այդ ապարատը ստացել է երկու խցիկ` 13 ու 2,1 Մպ-անոց թույլատրելիություններով և 3140 մԱ/ժ տարողության մարտկոց: Առայժմ հայտնի է միայն, որ Optimus G Pro-ն շուկայում կհայտնվի այս տարվա երկրորդ եռամսյակում, հնարավոր է` մայիս ամսին:

LG-ն ներկայացրել է սմարթֆոնների չորս դաս: Դրանցից ոչ բոլորն են նորույթ, սակայն թույլատրում են պատկերացում կազմել հարավ-կորեական ընկերության ռազմավարության մասին: Optimus-յան դասերը կոչվում են G, Vu, F և LII: Սրանք բոլորն էլ, LG-ի կարծիքով, ներկայանում են անհավանական “միջուկի”, առաջնակարգ էկրանի և համակցիչի համադրությամբ` նպատակ ունենալով միշտ լինել սպառողների ուշադրության կենտրոնում:

LG Tab book

LG Electronics-ը ներկայացրեց իր նոր Tab-Book LTE տրանսֆորմեր-նոութբուքը Mobile World Congress 2013-ին: LG ընկերության տաղավարում մեր թղթակիցը մոտիկից ծանոթացավ հետաքրքիր նորույթի հետ:

Պլանշետն ունի 11,6 դյույմանոց HD թույլատրելիության IPS ցուցասարք` համեմատաբար բարձր (400 նիտ) պայծառությամբ: Tab-Book-ում հնարավոր է տեղակայեն նոր սերնդի Intel Atom պրոցեսոր կամ լիարժեք նոութբուքային Intel Core i5 միկրոսարք: Նշվել է նաև 2-ից մինչև 8 Գբ ծավալ ունեցող օպերատիվ հիշողության, 128 Գբ-անոց կոշտ սկավառակի կամ 64 Գբ-անոց eMMC կուտակիչի առկայության մասին: Կոնկրետ մոդիֆիկացիայից կախված պլանշետի հաստությունը կտատանվի 15,9 մմ-ից մինչև 19,4 մմ, իսկ քաշը` 1,05 կգ-ից մինչև 1,2 կգ: Տպավորիչ է ինքնավար աշխատանքի տևողության մասին արված հայտարարությունը` մինչև 13 ժամ (որոշ կոնֆիգուրացիաների համար):

LG-ն ցուցադրեց նաև ամենաբարակ և ամենաթեթև ուլտրաբուքերից մեկը` LG Z360: Այն ունի ընդամենը 0,5 դյույմ հաստություն (1,27 սմ) և կշռում է մոտավորապես 1,1 կգ, ինչի շնորհիվ կարող է համարվել 13,3 դյույմանոց նոութբուքերից ամենադյուրակիրը:

Սարքավորումն ունի IPS ցուցասարք, որն օժտված է տեսադիտման մեծ անկյուններով և պիքսլների 1920 x 1080 թույլատրելիությամբ: LG-ն սպառողներին առաջարկում է բջջային պրոցեսորների ամենահզոր դասի` Intel Core-ի, ներկայացուցիչներից մեկով սարքավորված նոութբուք, որը բացի այդ կարող է պարծենալ MicroSD ձևաչափի հիշողության քարտերի համար նախատեսված երկու բնիկով: Քանի որ նոութբուքի կաղապարը պլաստիկից է, այնպիսի տպավորություն է առաջանում, թե այս ուլտրաբուքը շատ ավելի բարակ է, քան մետաղական կաղապար ունեցող մոդելների մեծամասնությունը:

LG-ն կիրառել է նաև մի շարք դիզայներական հետաքրքիր լուծումներ Z360 մոդելում: Դրանցից մեկը թաչփադն է, որը կաղապարի առանձին էլեմենտ չէ: Ի դեպ, նրա կողքին գտնվող կոճակները գործնականում չեն առանձնանում թաչփադի մնացած մակերևույթից: LG Z360-ը ստեղնաշարի ձախ մասում ստացել է մի քանի ֆունկցիոնալ ստեղներ, որոնք նախագծվել են հատկապես Windows 8-ի համար: Քանի որ ուլտրաբուքը չունի զգայունակ ցուցասարք, ապա այդ կոճակները Windows 8-յան նավիգացիան դարձնում են առավել հարմարավետ:

Sony

Հունվարի վերջին կայացած ճապոնական ծանուցումից հետո, Sony ընկերությունը որոշեց նորից ցուցադրել իր նոր` Xperia Tablet Z, պլանշետը, այս անգամ MWC 2013 ցուցահանդեսին` միջազգային տարբերակով: Հիշեցնենք, որը նորույթը, համաձայն ընկերության դասակարգման, 10 դյույմանոց ամենաբարակ պլանշետն է աշխարհում: Նրա հաստությունը ընդամենը 6,9 մմ է, իսկ քաշը` մոտ 490 գրամ:

Ինչպես վայել է դրոշակակիր մոդելներին` պաշտպանված լինելով փոշուց և խոնավությունից, 5 դյույմանոց Xperia Z սմարթֆոնը, որն ունի Full HD թույլատրելիություն և սարքավորված է քառամիջուկ պրոցեսորով, նույնպես ներկայացվել էր Sony ընկերության կողմից դեռևս հունվար ամսին: Այս երկու ապրանքներում հատկապես շեշտադրված են մուլտիմեդիային և խաղային հնարավորությունները. ապարատները կրում են Walkman և PlayStation Mobile լոգոտիպերը:

Կաձուո Հիրաիի (Kazuo Hirai) խոսքերով, 2013 թվականը կդառնա շրջադարձային և Sony Mobile-ը կհասնի նշանակալի հաջողությունների:

HTC

Այս տարի միջազգային MWC ցուցահանդեսին HTC ընկերությունը բերել էր նոր դրոշակակիր` HTC One, անդրոիդ-սմարթֆոնը:

Մոդելն ունի 4,7 դյույմանոց ցուցասարք` պիքսելների 1920×1080 թույլատրելիությամբ և 468 ppi խտությամբ: Սարքավորման ներսում գործում է հզոր` քառամիջուկ, 1,7 ԳՀց հաճախականության Qualcomm’s Snapdragon 600 պրոցեսորը: Բացի այդ, նորույթի կաղապարի տակ տեղ է հատկացվել նաև 2 Գբ օպերատիվ հիշողության, 32-ից մինչև 64 Գբ ծավալ ունեցող ֆլեշ-մոդուլի, NFC միկրոսարքի, Wi-Fi a/ac/b/g/n և Bluetooth 4.0 հաղորդակցական մոդուլների, GPS ընդունիչի համար: Ապարատը սատարում է HSPA և LTE ցանցերի աշխատանքը:

Որպես նոր դրոշակակրի օպերացիոն համակարգ հանդես է գալիս Android 4.1 Jelly Bean-ը` ֆիրմային Sense համակցիչի օժանդակությամբ: Վերջինս իր առանձնահատկությունների շարքում ունի BlinkFeed ֆունկցիան, որը թույլատրում է աշխատանքային սեղանին դուրս բերել նորություններ` 1400 աղբյուրներից: HTC One-ի համար Sense-յան ևս մեկ հետաքրքիր ֆունկցիա կրում է Zoe անվանումը և կարողանում է լուսանկարների շարքից ստեղծել կարճ հոլովակներ: Նորույթի հիմնական խցիկը արտադրողը նշել է UltraPixel տերմինով, և չնայած այն բանին, որ նա հագեցած է ընդամենը 4 Մպ-անոց BSI սենսորով, աչքի է ընկնում բարձր բնութագրիչներով, քանի որ կարող է պարծենալ լուսազգայուն ոսպնյակով (f/2.0) և օպտիկական կայունացման համակարգով: Սենսորն, իր հերթին, ընդունակ է որսալ 300%-ով ավելի շատ լույս, քան մյուս սմարթֆոնների մատրիցները: Սա, իհարկե, HTC-ի պնդումն է:

Սմարթֆոնը վաճառասեղաններին կհայտնվի արդեն այս ամիս` մոտավորապես 730 դոլար արժողությամբ:

NOKIA

Nokia-ն MWC 2013-ին ներկայացրել է չորս նոր բջջային հեռախոսներ

Microsoft Windows Phone հարթակի վրա սարքավորված երկու նոր սմարթֆոնները` Lumia 520-ը և Lumia 720-ը, օգտագործողներին առաջարկում են այն նույն հնարավորությունները, ինչ որ ունեին արդեն վաճառքում գտնվող դրոշակակիր` Lumia 920 և 820, ապարատները, սակայն ավելի էժան գնով: Lumia 520-ը կարժենա 139 եվրո, իսկ Lumia 720-ը` 249 եվրո:

Նոր մոդելների կողքին ցուցադրված էր նաև Nokia Lumia 920-ը, որը դեռ չի պատրաստվում զիջել Nokia Lumia շարքի դրոշակակրի տիտղոսը:

Ստորև ներկայացված լուսանկարներում ցուցադրված է Lumia 920-ի՝ ոչ բավարար լուսավորության պայմաններում հստակ լուսանկարներ ստանալու ֆունկցիան, որի հնարավորությունը ընձեռում է F2.0 դիաֆրագման:

Nokia Lumia 920

Մյուս երկու նորույթները` Nokia 105-ն ու Nokia 301-ը, զրկված լինելով սմարթֆոններին հատուկ գործառնականությունից, աչքի են ընկնում անհամեմատելի ցածր գներով:

Լապտերիկով հագեցած Nokia 105-ը կարժենա 15 եվրո:

Nokia 301-ը, որը պարունակում է մի քանի ներկառույց համացանցային հավելվածներ, այդ թվում Twitter-յան միկրոբլոգների ծառայության կլինետը և համացանցային WhatsApp Messenger-ը, կվաճառվի 65 եվրոյով:

Nokia-ն շարունակում է մեծ ուշադրություն դարձնել աքսեսուարներին: Անլար բարձրախոսները, որոնք ստեղծվել են JBL ապրանքանշանի հետ համագործակցության արդյունքում, շատերը հավանեցին, միակ խնդիրը նրա թանկարժեք լինելն էր, սակայն դրանք ապահովում էին ձայնի գերազանց հնչողություն:

Բացի այդ շուտով վաճառքում կհայտնվի երկար սպասված ավտոմեքենաների համար նախատեսված անլար լիցքավորման սարքը:

Zte

ZTE ընկերությունը ցուցադրեց 5,7 դյույմանոց ցուցասարքով հագեցած Grand Memo սմարթֆոնը: Բացի այդ ներկայացվել է նաև Firefox OS հարթակն օգտագործող սարքավորում:

Grand Memo-յի խոշոր ցուցասարքի թույլատրելիությունը կազմում է 720х1280 պիքսել: Սարքավորումն հագեցած է քառամիջուկ Qualcomm պրոցեսորով, 2 Գբ-անոց հիշողությամբ, 4G LTE ցանցերի սատարումով, ինչպես նաև 16 Գբ-անոց ներկառույց հիշողությամբ: Սմարթֆոնը պարփակված է 8,5 մմ հաստության իրանի մեջ:

Ապարատն աշխատում է Android Jelly Bean 4.1 օպերացիոն համակարգի և ZTE ընկերության կողմից նախագծված Mifavour համակցիչի օժանդակությամբ: Grand Memo-ն ունի 13 Մպ-անոց հիմնական և 1 Մպ-անոց ճակատային խցիկներ:

Սմարթֆոնը վաճառքում ենթադրաբար կհայտնվի 2013 թվականի երկրորդ եռամսյակում, սակայն ստույգ ինֆորմացիա չկա:

Երկրորդ սարքավորումը, որը ներկայացվել է ZTE-ի կողմից, Firefox OS-ի հիման վրա կառուցված Open ապարատն է: Այն ունի 3,5 դյույմանոց ցուցասարք, 256 Մբ օպերատիվ հիշող սարք, 512 Մբ ներկառույց հիշողություն: Ապարատն հագեցած է 3,2 Մպ-անոց խցիկով, Bluetooth 2.1, A-GPS և Wi-Fi մոդուլներով: ZTE-ն պլանավորել է հեռախոսի վաճառքն սկսել այս տարվա կեսերին:

Ինչ վերաբերում է հենց օպերացիոն համակարգին, ապա MWC 2013 ցուցահանդեսի ժամանակ կայացավ նրա հերթական ցուցադրությունը. նույն պահին հանրությանը ներկայացվեց HTML5-ի հիման վրա ստեղծված հավելվածների համացանցային Firefox Marketplace խանութը: Հիշեցնենք, որ Mozilla զննարկչյան օպերացիոն համակարգը կառուցված է HTML5-ի, JavaScript-ի և CSS3-ի հիման վրա, և նախատեսված է վեբ հավելվածների հետ աշխատելու համար:

Վերջաբան

Անցած իրադարձության` MWC 2013 ցուցահանդեսի, նախնական ամփոփումը կատարելով, կարելի է միայն նախանձել այն կազմակերպողների մասնագիտական խորաթափանցությանը և հեռատեսությանը` ցուցահանդեսը նոր, ավելի ընդարձակ տարածք` Fira Gran Via, տեղափոխելու առումով, քանի որ ցուցահանդեսի նկատմամբ հետաքրքրությունն, իրոք, անասելի չափով աճել է: Այսպես, այս տարի MWC միջազգային ցուցահանդեսը նորից ռեկորդ սահմանեց իր այցելուների թվով: Այս միջոցառման կազմակերպիչները` GSM ասոցիացիայի ներկայացուցիչները, հայտարարեցին, որ ցուցահանդես` 4 օրվա ընթացքում, այցելել է ավելի քան 75 000 մարդ` աշխարհի 200 երկրներից:

Մրցանակներ

Mobile World Congress-ը բջջային սարքավորումներին նվիրված աշխարհի խոշորագույն շոուներից է, հետևաբար այս միջոցառման կազմակերպիչների կողմից տրված մրցանակները հատկապես նշանակալի են և արժեքավոր: Բարսելոնայում հայտնի դարձան այս տարվա հաղթողները:

Նյութից դուրս մնացած կադրեր