GamePad` խաղային կցորդիչ Samsung-ից [տեսանյութ]
Այսօր սպառողը ժամանակակից սմարթֆոնից ակնկալում է ավելին, քան ուղղակի զանգեր իրականացնելը: Արդյունաբերությունը հաշվի է առնում գնորդների պահանջները, և դրա հետ մեկտեղ թողարկում նոր արտադրատեսակներ, որոնք հեռախոսները դարձնում են մուլտիմեդիալ և զվարճալի համակարգեր: Շուկայում ներկայացվել են բազմաթիվ գաջեթներ՝ սմարթֆոնների համար նախատեսված գեյմփադեր: Դրանցից մեկն է հանդիսանում Samsung GamePad-ը, որը ներկայացվել էր MWC 2014—ին:
Samsung ընկերությունը սարքավորման համար «տիեզերական» դիզայն չի մշակել, և կորեական արտադրողի GamePad-ն իր արտաքին տեսքով աչքի չի ընկնում: Գաջեթի կաղապարը պատրաստված է որակյալ պլաստիկից, կշիռը 195 գրամ է, ֆիզիկական չափերն են 137,78 × 31,80 × 86,47 մմ: Սարքը լիցքավորվում է microsUSB-ի միջոցով, առկա է HDMI միակցիչ և NFC չիպ:
Ճակատային վահանակի վրա տեղադրված է D-pad մանիպուլյտարոր, երկու միանման մինի-ջոյսթիկներ և գործողության չորս կոճակներ, ինչպես նաև Start կոճակ S Console հավելվածը մեկնարկելու համար (գործառույթն աշխատում է միայն Android 4.3-ի և ավելի բարձր ՕՀ-ի հսկողության ներքո աշխատող սարքավորումների վրա): Վերին հատվածում կա երկու ձգան, ստորին մասում՝ Select ու Start կոճակներ (վերջինս ակտիվացնում է խաղի ժամանակավոր դադարը) և Bluetooth միակցիչ, որը պատասխանատու է GamePad-ը միացնելու և անջատելու համար:
GamePad-ի վերին հատվածում առկա է շարժական մետաղական շրջանակ, որի ետնամասում փակցված է ռետինե ներդիր՝ նախատեսված է սմարթֆոնը պահելու համար: Շրջանակի մեջ հնարավոր է տեղադրել 4-6.3 դյույմ անկյունագծով սարքավորումներ: Հեռախոսի և գեյմփադի միացումն իրականանում է NFC-ի և Bluetooth-ի միջոցով:
GamePad –ի հետ համատեղելի խաղերի թիվը դեռևս համեմատաբար քիչ է: Դրանց շարքում կան նաև վճարովի հավելվածներ: Ամեն դեպքում, գեյմփադով խաղալը շատ ավելի զվարճալի է՝ բոլոր խաղերն սկսում են «հնչել» նորովի և ավելի հետաքրքիր ձևով: GamePad-ի բացասական կողմը վերջինիս բարձր գինն է (մոտ $85), քանզի այն աշխատում է միայն Samsung-սարքավորումների հետ:
