Rate.am բջջային հավելված՝ փոխարժեքը քո գրպանում [տեսանյութ]

Շատերին ծանոթ է տարադրամի փոխարժեքների մասին տեղեկություններ տրամադրող  rate.am կայքը, որը գործում է 2009-ից: Այսօր MWnews.am-ը Ձեր ուշադրությանն է ներկայացնում կայքի բջջային տարբերակը՝ rate.am հավելվածը, որը նախագծել է ծրագրային ապահովմամբ զբաղվող SFL ընկերությունը:

rate.am հավելվածը MWnews.am-ին առավել մանրամասն ներկայացրեց հավելվածի մենեջեր Անի Աղաբաբյանը:

Rate.am բջջային հավելվածը հնարավորություն է տալիս օպերատիվ կերպով տեղեկանալ տվյալ պահին գործող տարադրամի փոխարժեքների մասին: Հավելվածն աշխատում է iOS և Android օպերացիոն համակարգերի հետ: Շուտով պատրաստ կլինի նաև Windows Phone տարբերակը:

Հավելվածը բաղկացած է մի քանի բաժիններից: Գլխավոր մենյուի «Բանկեր» բաժնում ցուցադրվում են ՀՀ բոլոր բանկերը: GPS համակարգի ակտիվացման դեպքում, բանկերը ցուցադրվում են դասակարգված՝ ըստ Ձեր դիրքին մոտ գտնվելու հեռավորության: Բանկերը կարելի է դիտել նաև քարտեզի տեսքով:

«Բանկեր» բաժնում ցուցադրվում են նաև բանկերի կողմից առաջարկվող փոխարժեքները: Նույն էջի վերևի աջ մասում կարելի է ընտրել արժույթը: Փոխարժեքները կարելի է դասակարգել ըստ աճման և նվազման: Մգեցված ցուցադրված են լավագույն առաջարկները:

Ընտրելով ներկայացված բանկերից որևէ մեկը՝ օգտագործողը կարող է մանրամասն տեղեկություններ ստանալ բանկի մասին՝ հասցե, հեռախոսահամար, աշխատանքային ժամեր, մասնաճյուղեր, դրանց դիրքը քարտեզի վրա: Կարելի է նաև ընտրել փոխարժեքի տեսակը՝ կանխիկ, թե անկանխիկ:

Rate.am հավելվածի «Փոխանակման կետեր» բաժնում «Բանկեր»-ի պես ներկայացված են փոխանակման կետերն իրենց փոխարժեքներով և մանրամասն տեղեկություններով:

Rate.am-ը պարունակում է նաև տեղեկատվություն մնացյալ բոլոր միջազգային փոխարժեքների մասին: Այդ տեղեկությունները տրամադրվում են ՀՀ կենտրոնական բանկի կողմից և ցուցադրվում հավելվածի «ՀՀ կենտրոնական բանկ» բաժնում:

Փոխարժեքների մասին տեղեկությունները թարմացվում են յուրաքանչյուր 15 րոպեն:
Ընտրելով «Որոնել մասնաճյուղեր» բաժինը՝ կարելի է քարտեզի վրա որոնել մոտ գտնվող բանկերի մասնաճյուղերը՝ նշելով հեռավորության շառավիղը: Կարելի է կատարել որոնում նաև ըստ արժույթի:

Անի Աղաբաբյանի խոսքով, շուտով կթողարկվի ծրագրի նոր թարմացումը, որում կավելանա արտայժույթի հաշվիչը:

Rate.am բջջային հավելվածը կարելի է ներբեռնել անվճար Play Store-ից և iTunes-ից:
Նշենք նաև, որ հավելվածն ունի ավելի քան 7000 օգտագործող: