Արմմոբայլ բջջային հեռախոսների վերանորոգման կենտրոնը 10 տարեկան է [հարցազրույց]

Հարցազրույց Արմմոբայլ ընկերության տնօրեն Արման Բարեգամյանի հետ:

Նախ շնորհավորում ենք Ձեզ ընկերության 10-ամյակի կապակցությամբ: Հետաքրքիր է, 10 տարի առաջ, երբ դեռ նոր էինք ձեռնարկում ընկերության ստեղծումը, ի՞նչ մտավախություններ ունեիք և ինչպե՞ս էիք պատկերացնում հաջողության ուղին: Արդյոք ըստ Ձեր պատկերացման Արմմոբայլը հենց այսպիսին պիտի լիներ: 

10 տարի առաջ թվային տեխնիկան սկսել էր զարգացում ապրելը, բջջային հեռախոսները մտել էին մարդկանց կենցաղ: Իհարկե, եթե համեմատելու լինենք, ապա հստակ կարող ենք ասել, որ այսօր զարգացման արդյունքներն ակնհայտ են, և այժմ գրեթե բոլորի համար բջջայինը անհրաժեշտ իր է, որն իր մեջ ներառում է կարծես թե ամեն ինչ…

Այո’, մենք վստահ էինք, որ այս ընկերությունը կկարողանա արդյունավետ գործել և ամրապնդել իր դիրքերը տեղական շուկայում: Ներկայիս պայմաններում հեռախոսը մարդկանց կենցաղի անբաժանելի մասնիկն է, և այն կարող է հաճախակի ընկնել, կոտրվել կամ վնասվել: Այստեղից կարելի է հետևություն անել, որ բջջայինների տարածվածությանը զուգահեռ մեր ընկերության գործունեությունը առավել կարևորվում է, ուստի մեր աշխատանքը ունեցել է ու շարունակելու է ունենալ պահանջարկ:

Առհասարակ բջջային հեռախոսի ձեռքբերումը մի խնդիր է, իսկ այն պահելը բոլորովին այլ, որովհետև շատ մարդիկ պարզապես չգիտեն այդ սարքի օգտագործման գրագետ ձևը: Թերևս ամենաարագը հենց թվային տեխնիկան է զարգանում, և հիմնվելով այդ հանգամանքի վրա կարող ենք պարզապես շեշտել, որ  մեր ընկերության 10 տարվա փորձը թույլ է տալիս արագ արձագանքել ցանկացած նորարարության և այդպիսով օգնել մեր հաճախորդներին:

Երբ շուկա մուտք գործեցիք, հետաքրքիր է, այդ ժամանակ նմանատիպ ծառայություններ կային, թե՞՝ ոչ:

Շուկայում նման ծառայության առկայությունը մի բան է, իսկ այդ ծառայության գրագետ մատուցումը լիովին այլ: Ծառայության ցանկացած ոլորտում պետք է ապահովել հաճախորդի և իր կողմից ներկայացված ապրանքի անվտանգ ու արդյունավետ սպասարկումը, և մենք բացառություն չենք: Այս ուղղությամբ իրականացնելով համապատասխան միջոցառումներ` շուկա մուտք  գործելիս մենք առաջինն էինք, որ ստացական էինք տրամադրում հաճախորդին:

Ստացականում գրանցվում է հեռախոսի մոդելը և IMEI-ը: Վերջինս կարծես հեռախոսի «պետհամարանիշը» լինի. ամեն հեռախոս իր յուրահատուկ IMEI-ը ունի, որը երբեք չի կրկնվում: Այսինքն՝ առանց այդ IMEI-ի որևէ  հեռախոս օպերատորին չի կարող միանալ: Եթե հեռախոսը IMEI չունեցավ, անգամ եթե քարտ դնեք, այն միևնույնն է, չի աշխատի:

Ձեր կայքում առավելությունների բաժնում նշված է այն մասին, որ հարկ եղած դեպքում բջջայինի վերանորոգում  իրականացնում եք նաև հաճախորդի ներկայությամբ: Ինչո՞ւ:

Իհարկե այդ երևույթը ցանկալի չէ, բայց կան հաճախորդներ և բջջային հեռախոսներ, որոնք որոշակի ինֆորմացիայի են տիրապետում. այդ ամենի գաղտնիությունը այսպես ասած ապահովագրելու համար, հատկապես, եթե մարդը ծանոթ չէ մեր մասնագիտացման մակարդակին, և առաջին անգամ է օգտվում մեր ծառայությունից, ուստի նրան կասկածներից զերծ պահելու համար լինում են նաև դեպքեր, երբ վերանորոգումն իրականացնում ենք հենց հաճախորդի ներկայությամբ: Սակայն, պետք է նշեմ, որ ցանկացած հաճախորդ, թեկուզ մեկ անգամ օգտվելով մեր ծառայությունից, հաջորդ անգամ լիովին վստահությամբ իր սարքավորումը հանձնում է մասնագետներին, ուստի տարեցտարի նվազում է թերահավատ հաճախորդների թիվը:

Երաշխիքային սպասարկման մասին խոսենք: Ձեզ մոտ հեռախոսների վերանորոգման պահեստամասերի երաշխիքը որքա՞ն է, բացի այդ, կարծես թե Հայաստանում հեռախոսամասերի ամենամեծ պահեստամասերը ( 30000 և ավելի-Լ.Մ.) հենց Ձեզ մոտ է, այնպե՞ս չէ: 

10 տարի առաջ և հիմա շուկայում առկա պահեստամասերը շատ են տարբերվում միմյանցից, եթե 10 տարի առաջ պահեստամասերի 90%-ը օրիգինալ էին, ապա այժմ օրիգինալ է միայն 50%-ը, մնացածը արտադրվում է Չինաստանում: Իհարկե նշեմ, որ Չինաստանում  ևս օրիգինալ պահեստամասեր են արտադրվում, բայց այժմ չգիտես ինչու ավելի շատ ոչ օրիգինալն են նախընտրում, թերևս դա պայմանավորված է այն հանգամանքով, որ ոչ օրիգինալը առավել մատչելի է:

Ուսումնասիրելով նաև Եվրոպական և Ռուսական շուկաները` պարզ դարձավ, որ այնտեղ սպասարկումը արդքան էլ բարվոք վիճակում չէ:   Նշեմ, որ 10 տարի առաջ տրվող երաշխիք ընդգրկում էր 40 օր, իսկ այժմ` 90 օր: Հիմա, սակայն, պահեստամաս դնելուց առաջ մենք հաճախորդից ճշտում ենք, թե ինքն ինչ կատեգորիայի պահեստամաս է ցանկանում իր բջջայինի համար: Միգուցե ուզում է, որ այն երեք օր աշխատի և վերջ ու նրան չի հետաքրքրում ավելին, կամ ցանկանում է, որ այն մեկ տարի աշխատի: Այսինքն՝ երաշխիքները շատ տարբերակված են,  ու այստեղ գնային տատանումներ կան, օրինակ՝գոյություն ունի օրիգինալ և ոչ օրիգինալ շլեյֆ (խոսքը բացվող հեռախոսների՝ էկրանը պլատային միացնող բացովի հատվածի մասին է). ոչ օրիգինալի դեպքում այն բացելու հնարավորության քանակը մոտավորապես 1000 անգամ է նախատեսված, իսկ օրիգինալը` մոտավորապես 20-30 հազար անգամ է նախատեսված, հետևաբար ավելի շատ բացելու հնարավորությամբ այդ շլեֆի գինն զգալի տարբերվելու է ոչ օրիգինալից: Եթե օրինակ՝ հաճախորդը ոչ օրիգինալ շլեֆ է ուզում, բնականաբար նա զգուշացվում է, որ երաշխիքը տարածվում կամ չի տարածվում ոչ օրիգինալ պահեստամասերի վրա, ինչի մասին նշված է լինում նաև մեր ստացականների վրա: Նախկինում նման խնդիրները գրեթե բացակայում էին, քանի որ հաճախորդներին հիմնականում տրվում էր օրիգինալ պահեստամասը:    Փաստորեն, ստացվում է, որ այժմը հաճախորդը ընտրության հնարավորություն ունի և կարող է ընտրել իրեն անհրաժեշտ ժամկետով աշխատող պահեստամասը. երեք օր, երեք ամիս կամ ավելի շատ ժամանակահատված ընդգրկող:

Նշեմ, որ երաշխիքից բացի նախատեսում ենք իրականացնել նաև ապահովագրություն, որի ուղղությամբ այժմ քայլեր ենք ձեռնարկում: Իսկ ինչ վերաբերում է ամենամեծ պահեստ ունենալուն, համեստություն չհնչի, դա այդպես է: Այսօր մեր ռեսուրսային պաշարը բավական մեծ է:

Ձեր ընկերություն բերված բջջային հեռախոսների քանի տոկոսն է ամբողջությամբ վերանորոգվում, եթե համեմատելու լինեք պատկերը 10 տարի առաջ և հիմա:

Նախկինում մեր սպասարկման կենտրոն բերված 10 հեռախոսից գրեթե 10-ն էլ վերանորոգվում էին, իսկ հիմա իրավիճակը այլ է. 10-ից կարող է վերանորոգվել ընդամենը 6-7-ը, իսկ դա պայմանավորված է այն հանգամանքով, որ այժմ բավականին շատ են այն հեռախոսների թիվը, որոնք փչանում են ոչ պրոֆեսիոնալների պատճառով: Բացի այդ 10 տարի առաջ սպասարկման կենտրոնները քիչ էին և նման «խելացի» վերանորոգման կենտրոններ էլ չկային: Վերջիններիս քանակն այժմ շատացել է. այժմ վերանորոգման կենտրոններում կան մարդիկ, որոնք ռադիոէլեկտրոնիկայի կամ էլեկտրոնիկայի հետ կապված կրթություն և մասնագիտացում չունեն, ուղղակի այսպես ասած «քթի ծակ» ունեն և փորձում են հեռախոս վերանորոգել:

Այսինքն՝ եթե ընդհանրացնենք, ապա այս ամենի արդյունքում ոչ թե մեր ծառայությունների որակն է ընկել, խոսքը մեզ մոտ բերված հեռախոսների վերանորոգման ավելի պակաս թվի մասին է, այլ այն, որ մեզ մոտ հեռախոսն արդեն հասնում է բազմապատկված սխալներով/թերություններով, ընդհուպ մինչև այն, որ հեռախոսը կարող է վերանորոգման ենթակա չլինել: Հեռախոսի սկզբնական անսարքությանն ավելանում է ոչ մասնագետների անփույթ վերաբերմունքը, իսկ արդյունքում այդ հեռախոսը վերանորոգելու հավանականությունը նվազում է: Այսինքն՝ մարդիկ դիմում են ոչ մասնագիտացված սպասարկման կենտրոնների, որոնք փչացնում են հեռախոսը, իսկ այնուհետև տվյալ հեռախոսը հայտնվելով մեր վերանորոգման կենտրոնում ենթարկվում է ուսումնասիրության. մեր մասնագետները փորձում են տարբերակել առաջնային թերությունը երկրորդային, երրորդային թերությունից, և արդյունքում կարող է պարզ դառնալ, որ հեռախոսը այլևս վերանորոգման ենթակա չէ:

Այսպիսով պետք է շեշտեմ, որ հեռախոսների վերանորոգմամբ զբաղվող ցանկացած ընկերության համար առաջնային է ճիշտ ախտորոշում(դիագնոստիկա) անելը, և որոշելը, թե տվյալ հեռախոսի ինչն է անսարք, իսկ վերանորոգելը շատ ավելի հեշտ է, հիմնականում վերանորոգման գործընթացը տևում է շատ կարճ, ավելի երկար տևում է հենց այդ դիագնոստիկա ասվածը, որից ոչ բոլորն են հասկանում:

Խոսենք ընկերության կադրային կազմի մասին: Ձեզ մոտ կադրային հոսքը կարծես թե մեծ չէ,  արդյունքում Ձեր ղեկավարած ընկերությունում փորձառու և պրոֆեսիոնալ մարդիկ են աշխատում: Հետաքրքիր է, կադրերին ընդհանրապես ինչպե՞ս կամ ինչ չափորոշիչներով եք ընտրում:

Ընկերությունը հիմնադրելիս որպես առաջնային նախապայման սահմանվել է, որ բոլոր աշխատողները սկսած տնօրենից պետք է բարձր որակավորում ունենան ռադիոէլեկտրոնիկայի ոլորտում: Ուստի մենք Հայաստանի պետական ճարտարագիտական համալսարանի (Պոլիտեխնիկ) հետ պայմանագիր ենք կնքել, ու այստեղից ռադիոէլոկտրոնիկայի բաժնի ուսանողները նախ մեզ մոտ պրակտիկա են անցնում, իսկ այնուհետև աշխատանքի են ընդունվում: Մեր աշխատակիցներն այս 10 տարիների ընթացքում եղել են հենց այդ բուհից, ովքեր ունեն համապատասխան մասնագիտական կրթություն: Իհարկե հասկանալի է, որ մասնագետը կարողանում է ամեն ինչ քանդել, իսկ հետո այդ միկրոսխեմաները նորից ճիշտ ձևով տեղադրել սարքի մեջ, մինդեռ ոչ մասնագետները, ովքեր, ցավոք, վերջին շրջանում շատացել են, քանդելով  ավելի շատ վնաս են հասցնում, հատկապես այն դեպքերի ժամանակ, երբ օրինակ հեռախոսը մեխանիկական խնդիր ունի, ինչն արտաքինից այդքան էլ տեսանելի չէ (օրինակ՝ բջջային հեռախոսի անտենան կարող է մեկ կորել, մեկ էլ նորից հայտվել..):

Կադրերի առումով պետք է նշեմ, որ մեր ընկերությունում կադրերի քանակը գնալով ավելանում է, և աշխատում են մարդիկ, ովքեր իսկապես սիրում են իրենց գործը և դա հանդիսանում է իրենց կյանքի անբաժանելի մասը: Նույն Պոլիտեխնիկից անգամ, եթե ուսանողները գալիս են ու տեսնում են, որ սա «իրենց խելքի բանը չի», թողնում, գնում են, նման դեպքեր երբեմն պատահում են, սակայն հիմնականում մեր թիմի կորիզը նույնն է. նույնն  մարդիկ են՝ տեխնիկական որակյալ կրթությամբ, մեծ աշխատասիրությամբ և գործի նվիրումով, ինչը կարծում եմ մեր առավելությունն է:

Հետաքիրքիր է հեռախոսների հիմնական տարածված թերությունները որո՞նք են, ի՞նչ սխալներ են անում օգտագործողները հիմնականում, և որպես մասնագետ ի՞նչ խորդուրդներ կտայիք:

Հիմնականում կարող ենք առանձնացնել հեռախոսների անսարքության երկու պատճառ. անսարքությունը կարող է պայմանավորված լինել գործարանային թերության առկայությամբ, կամ հիմնականում բերում են մեր կենտրոն ջուրն ընկած, մարդկանց ձեռքից ընկած հեռախոսներ: Եթե համեմատելու լինենք առաջ և հիմա, ապա պատկերը տարբերվում է, այսինքն` եթե նախկինում հեռախոսը ջուրը ընկնելիս միանգամից անջատվում էր, ապա այժմ այն չի անջատվում, քանի որ սարքի հիմնական դետալները նաև սոսնձով  փակված են: Արդյունքում մարդիկ սկսում են մտածել, որ չորացնելով կարող են իրենց հեռախոսը փրկել, բայց դա շատ սխալ է: Նախ նշեմ, որ չորացնելուց միայն մաքուր ջուրն է գոլորշիանում, իսկ ահա աղերը մնում են: Մաքուր ջուրը երբեք էլեկտրոնիկային ոչ մի բանով չի վնասի, այսինքն՝ եթե ջուրը մաքուր լինի, հեռախոսը չի փչանա, իսկ աղերը մնալով, սկսում են կամաց-կամաց միկրոսխեմաները փչացնել: Այսինքն՝ երկու-երեք օր անց արդեն ակնհայտ է դառնում վնասները:

Պարզապես խորհուրդ կտայի մարդկանց նման դեպքերում չփորձել ինքնուրույն  չորացնել մարտկոցը, հնարավորության դեպքում և հնարավորինս շուտ հանել այն մինչև մոտակա սպասարկման կենտրոն հասցնելը: Այդ կերպ մարդիկ կշահեն և ավելի քիչ ծախսերով նրանց հեռախոսները կվերականգնվեն:

Ցավոք, հիմա հաճախորդները երբեմն youtube-ում տեսահոլովակներ դիտելով փորձում են ինքնուրույն հարթել խնդիրը, առաջնորդվելով ուրիշի օրինակներով: Ոմանք բրնձի մեջ են դնում, որ հեռախոսի խոնավությունը քաշի, մյուսները արևի տակ են դնում, ու այդպիսով ավելի է վնասվում և բարդացվում սարքի վերանորոգման գործընթացը, քանի որ այդ ամենի արդյունքում կարող է տպասալը քայքայվել: Ինքը` տպասալը, մի քանի շերտից է և միկրո նանոտեխնոլոգիաների հետ է կապված, որը մենք չենք կարող վերականգնել ընդհանարապես. դրանք կարող են վերանորոգել միայն ռոբոտները:

Այսինքն՝ լավ կլինի մարդիկ նման դեպքերում բջջայինները պարզապես չմիացնեն և չփորձեն ջուրը ինքնուրույն գոլորշիացնել: Մեր ծառայությունը հատուկ նյութեր ունի, որը ջրազրկելուց բացի  հանում է սարքից նաև այդ աղային մասը, ինչն իհարկե հնարավորություն է տալիս ավելի արագ վերականգնել վնասը: Հասկանալի է, որ հաճախորդը ինքը երբեմն տեղյակ չի լինում այս ամենից և պարտավոր էլ չէ ուստի նրանց  մեղադրել չի կարելի, քանի որ սնկի պես աճող բազմաբնույթ հեռախոսների սպասարկման «խելացի» կենտրոններով է ողողված շուկան, իսկ երբեմն մի փոքր խնդրից նման կենտրոնները փորձում են մարդկանց անտեղյակությունն օգտագործելով գերշահույթներ ստանալ, նույնիսկ շատ թեթև և ոչ թանկ ծառայությունից:

Մեզ մոտ նման թերություններ կամ անազնիվ գործունեություն չկա, ամեն բան վերահսկվում է, հակառակ պարագայում դժվար թե 10 տարի գործեինք շուկայում և համարվեինք լավագույններից մեկը:

Գործընկերների մասին, ովքե՞ր են Ձեր գործընկերները:

Աշխատում ենք Orange-ի, Beeline-ի հետ, որպես գործընկեր ZTE ֆիրմայի հետ ենք համագործակցում: 10 տարի առաջ սկսեցինք համագործակցել նաև Ձեր ընկերության՝ Mobile World-ի հետ, այդ ժամանակ մարդկանց համար հնարավորություններ բավական փոքր էին, որպեսզի մատչելի ձևով տեղեկանային, թե ինչ է հեռախոսը, ինչպես պետք է այն օգտագործել. այդ տարիներին շատ-շատ էին իրականությանը ոչ մոտ լեգենդները բջջային հեռախոսների վերաբերյալ: Ամենակարևորը հետևյալն է. հեռախոսը պետք է վստահել միայն մասնագետներին. եթե նախկինում հեռախոսները ավելի էժան էին, ապա դրանք հիմա բավական թանկ արժեն, ու մարդիկ հաճախ հենց անվստահության պատճառով իրենց բջջայինի վերանորոգման համար դիմում են մի քանի վերանորոգման կենտրոնների, որոնք փորձում են վերանորոգել համապատասխան հեռախոսը, ու որպես արդյունք ավելի մեծ ծախսերի առջև են կանգնում:    Տարիներ առաջ, եթե բանակից զորացրվածները օրինակ` գազալցակայան էին բացում կամ մի կրպակ էին բացում և կոշիկ կարում, ապա հիմա իմ կարծիքով, ով բանակից գալիս է,  ուզում է հեռախոս սարքել, արդյունքում բազմաթիվ դեպքեր են լինում, որ հեռախոսը սարքելու փոխարեն այն ավելի են փչացնում/վնասում: Դրանով էլ կարելի է բացատրել այն հանգամանքը, որ այժմ մարդիկ ցանկություն են հայտնում իրենց հեռախոսը սարքել հենց իրենց աչքի առջև:

Հայաստանում այժմ մոտավորապես քանի նման «կենտրոն» է գործում: 

Շատ-շատ են, անհամար… , իսկ նորմալ բջջային վերանորոգող ընկերությունները մոտ տասն են, խոսքը ոչ արտերկրից սնվող կենտրոնների մասին է, որոնք նորմալ մասնագետներ ունեն: Իհարկե, երբեմն անգամ նրանց մոտ լինում են նաև ոչ մասնագիտական կրթությամբ աշխատակիցներ, սակայն նրանք փորձից ելնելով գոնե հմտացել են և հիմնականում գիտեն, թե ինչի հետ գործ ունեն: Մեր գործում կարևոր է ոչ միայն մասնագետ լինելը և ծառայության մատուցման որակը, այլև ազնվությունը. Մեր գործը հիմնված է հենց ազնվության վրա: Ուսումնասիրելով՝ Եվրոպայի, Ռուսաստանի Դաշնության, Ուկրաինայի օրինակը, թե ինչ վիճակում են նմանօրինակ ծառայությունների որակը արտերկրում` նկատեցի, որ այնտեղ սպասարկումը շատ վատ վիճակում է: Այնտեղ հեռախոս վերանորոգողները շատ քիչ են, հետևաբար նման ծառայություններ մատուցողները այնքան շատ գործ ունեն, որ կարող են անգամ հրաժարվել էժանագին հեռախոսներ վերանորոգելուց, որովհետև այդ գործընթացը կարող է անգամ հեռախոսի գնից թանկ արժենալ: Մեզ մոտ սակայն, նմանատիպ ծառայություններ մատուցողներն այնքան շատ են, որ մենք ոչ միայն պիտի բարձր որակ ապահովվենք, սպասարկման մեջ ազնիվ լինենք, այլ նաև հնարավորինս մատչելի մատուցենք մեր ծառայություները: Կարծում եմ, որ ցանկալի կլիներ, որ դաշտը կարգավորվեր օրինակ՝ լիցենզավորման միջոցով, որպեսզի ամեն մեկը հանգիստ չկարողանար նման ծառայություն առաջարկել ու արդյունքում բարդացներ նաև մասնագետների գործը: Ես մի քանի անգամ փորձել եմ այս դաշտի համար լիցենզավորման տարբերակներ գտնել, սակայն այս հարցը դեռ բաց է մնում:

Ապագա ծրագրերից ու նաև այն մասին, թե ի՞նչ կմաղթեիք Ձեր հաճախորդներին:

Հաճախորդներին կասեմ ընդամենը ինքնագործունեությամբ չզբաղվել և հեռախոսի անսարքության դեպքում անմիջապես դիմել մասնագետի, քանի որ հաճախ առաջին հայացքից ոչ մեծ խնդիրը հետագայում կարող է շատ ավելի մեծ ծախսերի առջև կանգնեցնել: Կապված ծրագրերի հետ, մենք մտադիր ենք սպասարկման կենտրոններ բացել ոչ միայն Երևանի այն վարչական շրջաններում, որտեղ  դեռ չունենք, այլև շրջաններում, որպեսզի հաճախորդների համար հնարավորինս հարմարավետ դառնա մեր ծառայություններից օգտվելը:

Լուսինե Մովսիսյան