LG G6-ը պաշտոնապես ներկայացվել է. 5,7 դյույմանոց էկրան` նեղ շրջանակներով, երկակի տեսախցիկ, ջրակայունություն

MWC 2017-ի նախաշեմին կազմակերպված հատուկ մամլո ասուլիսի շրջանակներում LG ընկերությունը ներկայացրեց իր նոր դրոշակակիր LG G6 սմարթֆոնը: Նորույթն ամբողջովին մետաղյա իրան ու խոշոր FullVision էկրան է կրում: Էկրանի անկյունագիծը 5,7 դյույմ է` 2880×1440 պիքսել թողունակությամբ (564 ppi) և կողմերի 18:9 (2:1) հարաբերակցությամբ: Որևէ հավելված թողարկելիս էկրանը երկու մասի է բաժանվում, օրինակ` տեսախցիկը թողարկելիս առաջին կեսում կարելի է դիտել արված լուսանկարները` օբյեկտիվը նոր նպատակի վրա ուղղորդելով:

LG G6-ը հագեցվել է 13 Մպ-ոց երկակի հիմնական տեսախցիկով: Դիմային տեսախցիկի թողունակությունն ընդամենը 5 Մպ է: Շարժական մարտկոցի հզորության ծավալն ընդամենը 3300 մԱ/ժ է: Հագեցված է նաև արագ լիցքավորման Quick Charge 3.0 տեխնոլոգիայով, որով հեռախոսը լրիվ լիցքավորվում է 96 րոպեում, իսկ կիսով չափ լիցքավորման համար 32 րոպե է անհրաժեշտ:

Սարքը ներկայացվել է երեք երանգներով` Mystic white, Ice platinum և Astro black, որն iPhone 7-ի Jet Black-ն է հիշեցնում: LG G6-ը վաճառքի կհանվի մարտին, արժեքն առայժմ չի հաղորդվում: