Sony-ն գովազդել է նոր դրոշակակիր Xperia XZ Premium սմարթֆոնը` գերդանդաղեցվող տեսանկարահանման գործառույթով [տեսանյութ]

Ճապոնական Sony ընկերությունը ներկայացրել է իր նոր դրոշակակիր Xperia XZ Premium սմարթֆոնը, որի նոր տեսախցիկն ունակ է այնպիսի շարժեր գրանցել, որոնք անտեսանելի են նույնիսկ մարդկային աչքի համար: Այն հագեցված է 4K HDR էկրանով, ինտելեկտուալ գործառույթներով, ինչպես նաև տվյալների գերարագ փոխանցման հնարավորությամբ, միևնույն ժամանակ ունենալով նրբագեղ հարդարանք:

Սարքը հագեցված է նոր Motion Eye տեսախցիկով` ներքին հիշողությամբ Exmor RS մատրիցայով, ինչը հնարավորություն է տալիս սմարթֆոնի սովորական տեսախցիկից հինգ անգամ ավելի արագ մշակել պատկերը, այժմ օգտատերը կարող է տեսահոլովակներ նկարահանել` 960 կադր/ վ արագությամբ, և դանդաղեցված ռեժիմում դիտել: Միևնույն ժամանակ, նախնական նկարահանման գործառույթը ավտոմատ կերպով թողարկում է կադրերի բուֆերացումը` մինչ տեսախցիկի փակաղակի սեղմումը, այսինքն` հենց տեսախցիկը շարժում է գրանցում:

Բացի այդ` նոր 19 Մպ-անոց մատրիցայի պիքսելների քանակը 19%-ով մեծացվել է, ինչի շնորհիվ տեսախցիկն ավելի շատ լույս է կլանում, դետալիզացված, հստակ լուսանկարներ է ստանում նույնիսկ ցածր լուսավորության կամ, ընդհակառակը, պայծառ միջավայրում:

Արտադրողը նաև նշում է, որ Xperia XZ Premium-ն առաջին սմարթֆոնն է պատմության մեջ, որ հագեցվել է 5,5 դյույմանոց 4K UHD (2160×3840) էկրանով` HDR սատարմամբ:

Xperia XZ Premium-ի պրոցեսորի դերում հանդես է գալիս նորագույն Qualcomm Snapdragon 835-ը, ինչի շնորհիվ սմարթֆոնը հնարավորություն ունի աշխատել Gigabit Class LTE ցանցերում (մինչև 1 Գբիթ/ վ) և USB Type-C բնիկով USB 3.1 չափանիշի սատարում է ստանում: Իսկ ջրից ու փոշուց պաշտպանված իրանն իրականացվել է Loop Surface նախատիպով` ապակե (Corning Gorilla Glass 5) կորացված եզրերով:

Xperia XZ Premium-ի համաշխարհային վաճառքը կմեկնարկի ընթացիկ տարվա մայիսին` օգտատերերին ներկայանալով «փայլուն քրոմ» և «մուգ սև» գունային լուծումներով: